Café i gConamara ag cur béim ar thábhacht tacaíochtaí gnó Gaeltachta i bhfeachtas nua de chuid Údarás na Gaeltachta
Tá POTA Café i gConamara páirteach i bhfeachtas a sheol Údarás na Gaeltachta an tseachtain seo. Léiríonn an feachtas 'An Chéad Chéim Eile' an chaoi a bhfuil an eagraíocht ag tógáil ar na blianta fada forbartha chun todhchaí nuálach a leagan amach do cheantair Ghaeltachta na hÉireann.
Trí sheacht scéal spreagúla, ceann as gach Gaeltacht in Éirinn, léiríonn an feachtas an chaoi a bhfuil an oidhreacht thraidisiúnta agus an fhiontraíocht nua-aimseartha ag cruthú pobail bheo inbhuanaithe Ghaeilge.
Tá POTA Café, i gcroílár Chonamara á reáchtáil ag an gcócaire mór le rá Diarmuid Ó Mathúna. Thug a dhúil sa bhia agus sa Ghaeilge ar thuras gan choinne é. D'fhág sé saol traidisiúnta na cocaireachta ar leataobh ar mhaithe le suíomh Gaeltachta, agus bhunaigh sé café a bhfuil níos mó ná bia amháin i gceist leis – is ceiliúradh é ar chultúr áitiúil mar a gcruthaíonn an teanga thraidisiúnta agus an cócaireacht chomhaimseartha eispéireas dochreidte. Thacaigh Údarás na Gaeltachta leis an ngnó bia áitiúil seo a chuir ar a chumas táirgí áitiúla a fháil agus an fhís chulináireachta seo a thiontú ina ghnóthas rathúil.
Dúirt Tomás Ó Síocháin, Príomhfheidhmeannach Údarás na Gaeltachta:
"Léiríonn an feachtas seo tiomantas Údarás na Gaeltachta tógáil ar an obair bhunúsach, ag glacadh na chéad chéimeanna eile le pobail, fiontraithe, agus nuálaithe chun a chinntiú go leanfaidh na ceantair Ghaeltachta ag dul ó neart go neart mar ionaid caomhnaithe cultúrtha agus nuálaíochta eacnamaíochta. Léiríonn na scéalta seo ní hamháin rathúlacht aonair, ach fís níos leithne na heagraíochta maidir le tacú le tionscnaimh a chinntíonn todhchaí bhríomhar do phobail Ghaeltachta na hÉireann agus a n-oidhreacht shaibhir á honórú ag an am céanna".
Agus na ceantair Ghaeltachta ag glacadh leis an ré digiteach, tá Údarás na Gaeltachta ag glacadh "na chéad chéimeanna eile, le chéile" leis na pobail uathúla seo, á gcur chun tosaigh i réimse na nuálaíochta teicneolaíochta. Trí infheistíochtaí straitéiseacha i mbonneagar digiteach, in áiseanna taighde AI, agus in ionaid ghorlaithe do ghnólachtaí nuathionscanta teicneolaíochta, táimid ag cruthú éiceachórais mar ar féidir le pobail teanga thraidisiúnta dul chun cinn a dhéanamh in aois na hintleachta saorga.
Cinntíonn an cur chuige réamhfhéachach seo nach bhfuil na ceantair Ghaeltachta díreach ag caomhnú a n-oidhreachta cultúrtha ach go bhfuil siad ag éirí ina moil do chomhlachtaí teicneolaíochta den chéad ghlúin eile, ag cruthú deiseanna fostaíochta ardscileanna a ligeann do dhaoine óga slí bheatha a thógáil agus iad ina gcónaí i bpobail Ghaeilge.