Dearbhán Forbartha Digití / Foirm Iarratais

Is é an cuspóir atá leis an Dearbhán Forbartha Digití cuidiú le gnólachtaí beaga leas a bhaint as uirlisí agus teicneolaíochtaí digiteacha le héifeachtúlacht ghnó a mhéadú, raon feidhme a leathnú agus iomaíochas gnó a fheabhsú.

Ní mór d’iarratasóirí leas a bhaint as an Scéim Digitithe Gnó roimhré le Plean Gníomhaíochta Digití a ullmhú le hiarratas a dhéanamh chuig Údarás na Gaeltachta faoin Dearbhán Forbartha Digití– tá an t-iarratas thíos le bheith bunaithe ar ghníomhartha a shainaithnítear i bPlean Gníomhaíochta Digití an iarratasóra.

Tá tacaíocht deontais ar fáil faoin scéim do chaiteachas tionscadail a leagtar amach i bPlean Gníomhaíochta Digití an iarratasóra, amhail síntiúis bogearraí ar feadh tréimhse 12 mhí, oiliúint in úsáid bogearraí agus cumraíocht bogearraí.

Tá an Dearbhán Forbartha Digití oscailte d’fhiontair bheaga (a bhfuil idir duine agus 50 duine fostaithe iontu) agus atá:

• ar cuideachta, duine féinfhostaithe nó comhpháirtíocht iad agus atá i mbun trádálafaoi láthair
• atá bunaithe agus ag trádáil le 6 mhí, ar a laghad
• atá cláraithe agus ag feidhmiú laistigh den Ghaeltacht
• atá sócmhainneach mar a léirítear sna ráitis airgeadais a sholáthraítear.

Beidh na fiontair seo a leanas i dteideal iarratas a dhéanamh ar an Scéim chomh maith:

• Eagraíochtaí spóirt atá i mbun gnó agus a bheadh inmhuirearaithe i leith cánach faoi Chás I nó II de Sceideal D murach díolúine atá leagtha amach in alt 235 den Acht Comhdhlúite Cánach
• Carthanais atá i mbun gnó a bheadh inmhuirearaithe i leith cánach mar ioncam trádála, murach díolúine ó cháin a bheith ar fáil faoi alt 208 den Acht Comhdhlúite Cánach

Ní mór imréiteach cánach reatha a bheith ag gnólachtaí ó na Coimisinéirí Ioncaim. Ní mór do ghnólachtaí Uimhir Thagartha Cánach agus Uimhir Rochtana Imréitigh Cánach a sholáthar chun a stádas Imréitigh Cánach a fhíorú ar thairseach ar líne na gCoimisinéirí Ioncaim.

• Gnólachtaí a bhfuil stádas carthanachta acu, eagraíochtaí tráchtála leathstáit, eagraíochtaí ‘seachbhrabúsacha’ , comhlachais trádála, comhlachtaí ionadaíocha amhail Cumainn Tráchtála
• Gnólachtaí atá ag feidhmiú in earnáil an ghuail nó in earnáil na cruach.
• Gnólachtaí atá gníomhach in earnáil phríomhúil na talmhaíochta, an iascaigh nó an dobharshaothraithe.
• Gnólachtaí atá páirteach i ngníomhaíochtaí neamh-incháilithe nó a bhfuil riosca do-ghlactha clú ag baint leo, dar le hÚdarás na Gaeltachta. Áirítear ar ghníomhaíochtaí neamh-incháilithe gníomhaíochtaí a bhaineann leis an méid seo a leanas:
  • Earnáil an chearrbhachais(mar a shainmhínítear san Acht um Chearrbhachas agus Crannchuir, 1956).
  • Siamsaíocht do dhaoine fásta.
  • Tobac agus táirgí gaolmhara.
  • Táirgí atá bunaithe ar channabas nach n-údaraítear mar chógais leighis.

Tabhair faoi deara nach liosta uileghabhálach é seo. Ba cheart aon cheist maidir le hincháilitheacht ghníomhaíochta a chur ar Údarás na Gaeltachta le go ndéanfaí measúnú ar an gcás.

Tá an deontas iníoctha ag ráta 50% den chaiteachas incháilithe, gan CBL san áireamh, suas le huasmhéid deontais €2,500 in aghaidh an iarratais (tá tairseach íosmhéid deontais €500 in aghaidh an iarratais, i.e. is é €1,000 an t-íoschaiteachas ar an tionscadal). Is féidir dhá thionscadal de chuid an Dearbháin Forbartha Digití, ar a mhéad, a cheadú d’fhiontar, deontas carnach suas le €5,000. Tá ceadú an dara deontas ag brath ar dhul chun cinn léirithe an ghnó mar atá leagtha amach i dtuarascáil na Scéime Digitithe Gnó. Is ar mhaithe le tacú le dul chun cinn digitithe an iarratasóra a bheidh an caiteachas incheadaithe.

Tabhair faoi deara le do thoil: Ní mór iarratas ar an Dearbhán Forbartha Digití a dhéanamh taobh istigh de thréimhse dhá bhliain ar a mhéad ó dháta ullmhaithe na tuarascála / an phlean faoin Scéim Digitithe Gnó.

(a) Táillí síntiúis bogearraí

• le haghaidh bogearraí gnó incháilithe NUA don ghnólacht do shíntiús bliana ar a mhéad (ní mór don ghnólacht an costas bliantúil síntiúis a thabhú sular féidir an deontas a íoc).
• atá ar fáil “ar an tseilf” (i.e. nach bogearraí saincheaptha don iarratasóir iad)
• níl leathnú ar líon na gceadúnas bogearraí atá ann cheana do chórais bogearraí atá in úsáid sa ghnó cheana féin indeonaithe.

I measc na samplaí bogearraí incháilithe tá:

• Bogearraí ríomhthráchtála
• Bogearraí Bainistíochta Caidrimh le Custaiméirí
• Bogearraí i leith áirithintí, íocaíochtaí nó coinní ar líne
• Bogearraí rianaithe oibre lena n-áirítear bogearraí bainistíochta ar seirbhísí allamuigh
• Bogearraí bainistíochta orduithe nó rialaithe stoic
• Bogearraí néalríomhaireachta SaaS a bhaineann go sonrach leis an earnáil (i gcás nach bhfuil sé seo sa ghnó cheana féin)
• Bogearraí bainistíochta allamuigh nó bainistíochta sreafa oibre
• Bogearraí ríomhshonrasctha nó bogearraí ríomhshínithe
• Gnáthbhogearraí oifige (do ríomhphoist, doiciméid, sprébhileoga agus rl) i gcás nach bhfuil sé seo sa ghnó cheana féin
• Bogearraí cibearshlándála (i gcás nach bhfuil sé seo sa ghnó cheana féin)
• Bogearraí cuntasaíochta nó párolla néalbhunaithe (i gcás aistriú go córas néalbhunaithe)
• Bogearraí samhaltaithe 3T (ar a n-áirítear samhaltú faisnéise foirgneamh)
• Bogearraí anailísíochta (lena n-áirítear córais IS)

(b) Cumraíocht Oiliúna agus/nó TF

I gcás ina n-éilíonn an gnólacht cúnamh saineolach maidir le:

• córais bogearraí a shuiteáil nó próisis TFC nua a chomhtháthú nó
• oiliúint bhainistíochta nó foirne le dul i ngleic leis an gcóras nua nó é a choinneáil ar bun lena úsáid a éascú agus leis an tairbhe is mó a fháil don ghnó.

(Tabhair faoi deara le do thoil nach féidir le méid oiliúna agus cumraíochta, curtha le chéile, a bheith níos mó ná 50% de na táillí síntiúis bogearraí).

• Níl bogearraí saincheaptha incháilithe do thacaíocht deontais faoin scéim.
• Níl córais a bhaineann le comhlíonadh rialála incháilithe do thacaíocht deontais faoin scéim.