Infheistíocht €8m á déanamh i gColáiste Íosagáin
Tús curtha le tógáil ar Champas Íosagáin a chruthóidh 200 post sa cheantar.
Tá claochlú spreagúil ar siúl i gcroílár Bhaile Mhúirne, Co. Chorcaí. Tá infheistíocht €8 milliún á déanamh chun Coláiste Íosagáin, an foirgneamh stairiúil a bhí ina scoil Ghaeltachta tráth, a athrú ó bhonn.
Faoi stiúir Údaráis na Gaeltachta, déanfar mol digiteach nua-aimseartha den seanfhoirgneamh. Cruthófar 200 post nua san ionad, rud a thabharfaidh spreagadh mór don gheilleagar áitiúil. Beidh deiseanna gnó agus tionscnaimh nua ag teacht ina dhiaidh freisin.
Is é 'Campas Íosagáin' an t-ainm a bheidh ar an ionad nuachóirithe seo. Agus na seanchlocha á múscailt as a suan, osclófar caibidil nua i stair an cheantair - ceann a gheallann todhchaí gheal don phobal áitiúil.
Tá an tionscadal á mhaoiniú trí dheontas €3.3 milliún ón gCiste Athnuachana agus Forbartha Tuaithe, mar aon le €2.7 milliún ó Chiste Forbartha Fiontar Réigiúnach (REDF) Fhiontraíocht Éireann.
Feidhmeoidh Campas Íosagáin mar ionad nuálaíochta den chéad scoth i gcroílár Ghaeltacht Mhúscraí. Cuirfidh an mol seo tacaíocht chuimsitheach ar fáil do raon leathan úsáideoirí - ó fhiontraithe áitiúla go hoibrithe cianda agus cuideachtaí ilnáisiúnta.
Lonnaithe i dtimpeallacht álainn na Gaeltachta, tá an t-ionad feistithe leis an teicneolaíocht is nua-aimseartha agus bonneagar gnó den scoth. Mar gheall air seo, is áis luachmhar é do ghnólachtaí ag gach céim dá bhforbairt - idir chomhlachtaí nuathionscanta agus ghnóthaí seanbhunaithe. Cuireann an t-éiceachóras tacúil seo deiseanna iontacha ar fáil do ghnólachtaí fás agus forbairt.
Tá an tionscadal seo i dtús a aistir agus táthar ag súil go gcríochnófar na hoibreacha laistigh de 15 mhí. Cuimsíonn an clár oibre athchóiriú cuimsitheach ar an bhfoirgneamh stairiúil reatha agus forbairt nua a nascfaidh go híogair leis an struchtúr bunaidh. Is é caomhnú na ngnéithe stairiúla an príomhthosaíocht tríd an tionscadal ar fad, rud a chinnteoidh go gcoimeádtar oidhreacht chultúrtha an láithreáin.
Nuair a osclófar Campas Íosagáin, ní hamháin go gcuirfear spás oibre den scoth ar fáil do ghnólachtaí na háite, ach cruthófar timpeall 200 post nua de réir mar a bhláthóidh na gnólachtaí ann. Sa chéad chéim den tionscadal, tá sé beartaithe tacú le breis is 45 gnólacht agus tá céimeanna forbartha breise le teacht amach anseo.
D'fháiltigh an tAire Breisoideachais agus Ardoideachais, Taighde, Nuálaíochta agus Eolaíochta, Patrick O’Donovan, TD, roimh thús na n-oibreacha: "Tá áthas an domhain orainn go bhfuil tús curtha le hathfhorbairt Choláiste Íosagáin. Is céim chun cinn í seo don cheantar ar fad - don gheilleagar áitiúil agus d'fhorbairt na tuaithe i mBaile Mhúirne. Tá moladh mór tuillte ag Údarás na Gaeltachta as ucht an tionscnaimh seo a chur ar bun. Ní hamháin go bhfuil siad ag tabhairt sean-fhoirgneamh stairiúil tábhachtach ar ais chun beatha, ach beidh sé ina chrann taca don nuálaíocht, do chruthú post, agus do chomhoibriú sa cheantar”.
"Cuirfidh an mol digiteach nua borradh faoi fhorbairt ár bpobal tuaithe trí bhonneagar nua-aimseartha a chur ar fáil do chianoibrithe, gnólachtaí beaga agus móra araon. Osclóidh sé deiseanna nua don cheantar trí chomhlachtaí náisiúnta agus idirnáisiúnta a mhealladh. Léiríonn an infheistíocht seo céim thábhachtach in athbheochan agus in aithint thábhacht na mbailte agus na réigiún beag ar fud na hÉireann, ag cinntiú fás inbhuanaithe agus deiseanna eacnamaíocha do na glúnta atá le teacht."
Dúirt Siobhán Ní Ghadhra, Cathaoirleach Údarás na Gaeltachta: "Is céim thábhachtach chun cinn í athrú Choláiste Íosagáin go Campas Íosagáin i bhforbairt na Gaeltachta. Ní hamháin go gcothaíonn an togra seo ár n-oidhreacht luachmhar, ach cuireann sé borradh faoi gheilleagar nua-aimseartha i gcroílár na tuaithe. Trí áis a chruthú ina mbeidh an nua agus an sean ag teacht le chéile, beimid ag cinntiú go mbeidh borradh agus beatha i bpobail na Gaeltachta sna blianta amach romhainn."
"Táimid thar a bheith sásta go bhfuil an t-athchóiriú ar Choláiste Íosagáin faoi lán seoil tar éis na mblianta fada feithimh," a dúirt Tomás Ó Síocháin, Príomhfheidhmeannach Údarás na Gaeltachta. "Is céim chinniúnach é an tionscadal seo a chuirfidh borradh faoin bhfostaíocht sa cheantar, ag cruthú deiseanna spreagúla do chéimithe tríú leibhéal."
"Cuirfidh Campas Íosagáin dlús le cúrsaí taighde agus forbartha, ag tógáil ar bhuanna an réigiúin - go háirithe in earnáil an bhia agus na gcomhábhar i mBaile Bhuirne agus i gCorcaigh trí chéile. Chomh maith leis sin, tapófar deiseanna nua náisiúnta cosúil le forbairt AI na hArd-Intleachta don Ghaeilge do sheirbhísí poiblí. Nuair a bheidh an campas faoi lán seoil, meastar go mbeidh suas le 320 post á gcur ar fáil i ngnólachtaí agus i bhfiontair faoi choimirce an Údaráis. "
Dúirt Dan Barry, Stiúrthóir Réigiúnach don Deisceart agus don Oirdheisceart d'Enterprise Ireland: "Tá Enterprise Ireland tiomanta do thacú le gnólachtaí Éireannacha ag gach céim dá bhforbairt - ón tús go dtí fás agus scálú idirnáisiúnta. Léiríonn tionscadail ar nós Champas Íosagáin an tábhacht a bhaineann le forbairt réigiúnach inár straitéis náisiúnta. Trí chomhoibriú dlúth idir páirtithe leasmhara agus tacaíocht chuimsitheach a sholáthar, cuirimid borradh faoi fhás eacnamaíoch sna réigiúin. Molaim go hard an fhoireann ar fad a chuir a gcuid ama agus saineolais ar fáil chun an tionscadal tábhachtach seo a chur i gcrích."
Bunaíodh Coláiste Íosagáin mar choláiste ullmhúcháin sa bhliain 1940, ainmnithe i ndiaidh shaothar cáiliúil Phádraig Mhic Phiarais. Anois, agus athrú mór ag teacht ar an bhfoirgneamh stairiúil seo, tosaíonn caibidil nua ina scéal fada.