Gradaim na Gaeltachta 2024: Glaoch ar Eagraíochtaí Pobail agus Coistí Deonacha 

Tá Údarás na Gaeltachta ag lorg iarratais ó eagraíochtaí pobail agus coistí deonacha ar fud na Gaeltachta do chomórtas náisiúnta Ghradaim na Gaeltachta 2024. Is deis iontach é seo d'eagraíochtaí a gcuid oibre a chur i láthair agus aitheantas a fháil don obair fhiúntach atá ar siúl acu ina bpobail féin.

Tá réimse leathan catagóirí sa gcomórtas, lena n-áirítear fiontraíocht shóisialta, turasóireacht, timpeallacht, seirbhísí sóisialta pobail, obair na gcoistí pobail agus tionscnaimh don óige. Spreagtar gach eagraíocht agus coiste deonach sa Ghaeltacht le hiarratas a chur isteach, beag beann ar mhéid nó ar réimse oibre.

Dúirt Rónán Mac Con Iomaire, Stiúrthóir Forbartha Pobail Réigiúnaí agus Pleanála Teanga Údarás na Gaeltachta:

"I ndiaidh an rath a bhí ar chomórtas na bliana seo caite, táimid ag súil go mór leis na hiarratais a thiocfaidh isteach i mbliana. Bhí caighdeán na n-iarratas an-ard anuraidh agus léirigh sé an obair dochreidte atá ar siúl inár bpobail Ghaeltachta. I mbliana, táimid ag súil le tuilleadh tograí nuálacha a fheiceáil, go háirithe ó na coistí deonacha beaga atá ag obair go dian ina bpobail féin."

Dúirt Príomhfheidhmeannach Údarás na Gaeltachta, Tomás Ó Síocháin:

"Bhí áthas orainn an t-aiseolas dearfach a fháil ó na rannpháirtithe anuraidh. Chuir na gradaim ardán ar fáil do thograí nach raibh mórán airde orthu roimhe sin. I mbliana, táimid ag iarraidh ar gach eagraíocht agus coiste sa Ghaeltacht smaoineamh ar iarratas a chur isteach. Is cuma cé chomh mór nó beag is atá an togra - má tá sé ag cur le forbairt na Gaeltachta agus na Gaeilge, tá muid ag iarraidh cloisteáil uait."

Tá Foirm Iontrála ar fáil ag www.udaras.ie/pobal/gradaim-na-gaeltachta/

Ní ghlacfar le hiarratais ach tríd an bhfoirm iarratais ar líne seo.

Moltar do gach eagraíocht agus coiste deonach sa Ghaeltacht smaoineamh ar iarratas a chur isteach agus a gcuid oibre luachmhar a chur os comhair an phobail.