Ráiteas ó Chruinniú Boird Údarás na Gaeltachta – 11ú Márta 2022
Tacaíocht Ceadaithe do 35 Post Nua Gaeltachta
Ceadaíodh tacaíocht do 35 post nua Gaeltachta ag an gcéad chruinniú de chuid Bord Údarás na Gaeltachta ó cuireadh deireadh le srianta COVID-19. Tionóladh an cruinniú i gteic@Gaoth Dobhair ar Pháirc Ghnó Ghaoth Dobhair, Co. Dhún na nGall inniu (11/03/2022). Ag an gcruinniú labhair Cathaoirleach Údarás na Gaeltachta Anna Ní Ghallachair thar ceann an Bhoird agus dúirt “Tá sé deas a bheith i bhfochair a chéile arís agus srianta COVID-19 ardaithe.” Labhair sí chomh maith ar ócáid insealbhaithe Mhairéad Ní Mhaonaigh mar ealaíontóir cónaithe i gteic@Gaoth Dobhair “Tá sé iontach go mbeidh amhráin ar an sean-nós á gcur ar fáil do dhaoine anseo i gteic@Gaoth Dobhair.”
Tacaíocht do 35 post nua ceadaithe le hinfheistíocht suas le €1.4m i gcomhlachtaí Gaeltachta
Cheadaigh Bord Údarás na Gaeltachta líon tograí inniu (11/03/2022) ina mbeidh 35 post nua lánaimseartha á gcruthú iontu agus infheistíocht suas le €1.4m ag baint leo idir infheistíocht phríobháideach agus tacaíocht Stáit nuair atá na tograí sin faoi lán seoil. Is le tacaíocht a thabhairt do chomhlachtaí Gaeltachta i gContaetha na Gaillimhe, Mhaigh Eo agus Dhún na nGall a bhain formhór na dtograí a bhfuil fostaíocht nua le cruthú iontu.
Ciste €180,00 ceadaithe chun tacú le comhlachtaí dul i mbun digitithe
Ag Cruinniú Boird de chuid an Údaráis inniu ceadaíodh ciste de €180,000 chun Scéim Dearbhán Digitiú a chur ar fáil do 20 chomhlacht Gaeltachta. Cuirfidh an scéim seo, a mbeidh uasmhéid nach mó ná €9,000 nó 100% den chaiteachas incháilithe i gceist léi, tacaíocht ar fáil do chomhlachtaí chun cúrsaí digiteacha a chur chun cinn. Beidh comhlachtaí in ann an dearbhán a úsáid chun straitéis dhigiteach, seirbhís theicniúil a chur in áit agus/nó seirbhís chomhairleach a fháil ó shaineolaithe aitheanta chun plean bunaithe ar riachtanais an chomhlachta a fhorbairt. Cuirfidh an scéim deis ar fáil do chomhlachtaí forbairt bhreise a dhéanamh agus tuilleadh fostaíochta a chruthú de réir mar atá na straitéisí digiteacha agus seirbhísí teicniúla á gcur i bhfeidhm.