Buaiteoirí Ghradaim na Gaeltachta 2024 Fógartha

D'fhógair Údarás na Gaeltachta buaiteoirí Ghradaim na Gaeltachta ag searmanas speisialta sna Forbacha, Co. na Gaillimhe, Déardaoin, an 28ú Samhain. Bhronn an Príomhfheidhmeannach Tomás Ó Síocháin agus an Cathaoirleach Siobhán Ní Ghadhra na gradaim ar eagraíochtaí agus ar choistí pobail as a gcuid oibre den scoth ar son phobal na Gaeltachta.

Ag labhairt ag an ócáid, dúirt Príomhfheidhmeannach Údarás na Gaeltachta, Tomás Ó Síocháin:

'Is léiriú iontach é Gradaim na Gaeltachta ar an obair cheannródaíoch atá ar siúl sna pobail Ghaeltachta. Ó thograí turasóireachta go tionscnaimh ghlas-gheilleagair, tá na pobail ag léiriú nuálaíochta agus seasmhachta. Tá sé tábhachtach go n-aithneofaí agus go gceiliúrfaí an méid atá á bhaint amach ag na grúpaí seo ar mhaithe leis na pobail.'

Chuir Cathaoirleach Údarás na Gaeltachta, Siobhán Ní Ghadhra, leis sin:

"Is údar mórtais agus misnigh é an caighdeán ard oibre atá ar siúl i ngach ceantar Gaeltachta. Tá na buaiteoirí seo ag léiriú go bhfuil todhchaí gheal i ndán dár bpobail Ghaeltachta, agus iad ag cothú na teanga agus an chultúir, ag cruthú fostaíochta, agus ag forbairt bonneagair phobail ar ardchaighdeán."

Dúirt Rónán Mac Con Iomaire, Stiúrthóir Forbartha Réigiúin, Pobail & Teanga, Údarás na Gaeltachta:

"Is léiriú iad Gradaim na Gaeltachta ar an obair mhór atá ar bun ag eagrais forbartha pobail fud fad na Gaeltachta. Neartaíonn na heagrais seo a gcuid pobail, agus an Ghaeltacht trí chéile dá réir, agus is léir an tionchar dhearfach atá ag a gcuid tograí  ar an teanga, ar an bpobal agus ar an ngeilleagar áitiúil. "

 

Buaiteoirí na gCatagóirí

Togra Turasóireachta na Gaeltachta

Bronnadh an gradam seo ar Chomharchumann Forbartha Ionad Deirbhile, An Fód Dubh, Co. Mhaigh Eo as a gcuid oibre ar Áras Scéalta an Atlantaigh.

Duais an Óige

Bronnadh an gradam seo ar an Lárionad Acmhainní Nádúrtha, Cill Ulta, Co. Dhún na nGall as a dtogra nuálach "Preab san Úir".

Togra Gaeltachta Glaise

D'éirigh le Comharchumann Mhic Dara Teo., An Cheathrú Rua, Co. na Gaillimhe an gradam seo a bhaint amach as a dtogra Fuinnimh In-athnuaite Pobail.

Togra Diaspóra na Gaeltachta

Bronnadh an gradam seo ar Chomhaontas Turasóireachta Chorca Dhuibhne, Co. Chiarraí as a gcuid oibre ar cheangail chultúrtha, oideachais agus gnó le Springfield, S.A.M.

 

Togra Seirbhísí Sóisialta na Gaeltachta

Bhain Áislann Chill Chártha CLG, Co. Dhún na nGall an gradam seo as soláthar réimse leathan seirbhísí agus imeachtaí pobail.

Togra Ealaíne

Bronnadh an gradam seo ar Ionad Cultúrtha an Dr. Ó Loingsigh, Baile Bhúirne, Co. Chorcaí as soláthar réimse leathan tograí ealaíne agus cultúrtha.

Togra Fiontair Shóisialta

D'éirigh le Comharchumann Forbartha Árann, Inis Mór, Co. na Gaillimhe an gradam seo a bhaint amach as a gcuid oibre ar Ionad Fiontraíocht Eoghanachta.

 

Gradaim na gCoistí Pobail

Mór-Bhuaiteoir

Bronnadh an gradam foriomlán ar Choiste Forbartha Chnoc Fola, Co. Dhún na nGall as a gcuid oibre ar fhorbairt an ionad pobail agus áiseanna pobail sa cheantar.

Buaiteoirí Réigiúnacha:

- Tuaisceart: Coiste Forbartha Chnoc Fola, Co. Dhún na nGall

- Deisceart: Fiontair Pobail CTR, An Rinn, Co. Phort Láirge as a bPáirc Spóirt Uile Aimsire

- Iarthar: Coiste Halla na bhForbacha, Na Forbacha, Co. na Gaillimhe as eagrú áiseanna agus imeachtaí

Léiríonn na buaiteoirí seo an obair den scoth atá ar siúl i bpobail Ghaeltachta ar fud na tíre, ag cur chun cinn na teanga, an chultúir agus forbairt inbhuanaithe na gceantar Gaeltachta.